Labour اتحادیاں تے علاقائی طاقتاں نال شراکت داری قائم تے مضبوط کرسی تاکہ اندرون تے بیرون ملک سلامتی تے خوشحالی فراہم کیتی جا سکے۔
اساں دنیا بھر وچ آپنے ثقافتی رابطے ودھان لئی دوجیاں مُلکاں توں آن آلی آپنی قابل فخر کمیونٹیز نی آپنی کمیونٹی تے یُوکے بارے شراکت کی تسلیم کردیاں انہاں نال رل کے کم کرساں۔
Labour دی قیادت وچ برطانیہ
- عالمی سطح اُپر مضبوط ہوسی تے ایس گل کی یقینی بناسی کہ اس نی اواز سنی جائے۔
- آپنے قومی مفاد نے حصول نی کوشش وچ پُراعتماد ہوسی۔
- دنیا بھر وچ آپنے اتحادیاں تے شراکت داراں نال فیر جُڑسی۔
- دنیا بھر وچ نویں جدید شراکتاں بناسی
- انسانی حقوق تے بین الاقوامی قانون کی برقرار رکھسی۔
- برطانیہ وچ دوجیاں مُلکاں توں آن آلی کمیونٹیز نال رل کے ترسیلاتِ زر بھیجن نے پوشیدہ اخراجات سمیت معاملیاں اُپر کم کرسی
پاکستان
- برطانیہ وچ پاکستانی کمیونٹی نی اک لمی تے قابل فخر تاریخ اے-
- Labour آپنے ممالک نے وچکار لوکاں نے آپس وچ قریبی تعلقات نی قدر کرنی اے تے انہاں نی حمایت تے ترقی نی کوشش کرنی رہسی۔
- یُوکے-پاکستان تعلقات دوناں مُلکاں لئی اہم نیں۔ پاکستان برطانیہ لئی اک اہم شراکت دار تے دولت مشترکہ خاندان نا اک قابل قدر رکن اے۔ اک Labour حکومت باہمی دلچسپی نے شعبیاں بشمول موسمیاتی بحران بارے مل کے کم کرسی، خاص طور اُپر اس تباہ کن سیلاب نے حوالے نال جس پاکستان کی بوہت متاثر کیتا اے، نالے سلامتی تے جمہوریت بارے وی۔
ایغور نے لوک
- Labour Party نے ایغور نے لوکاں نی حالت زار اُپر مسلسل آواز بلند کیتی اے، جس نے بارے UN نے باہیا اے کہ اے انسانیت نے خلاف جرائم بن سکدے نیں۔
- اساں حکومت اُپر جبری مشقت دے استعمال نی وجہ توں Xinjiang توں آن آلی کپاس اُپر پابندی لان لئی دباؤ پان سمیت، ذمہ داراں نے خلاف انسانی حقوق نی پابندیاں لان تے سخت کارروائی نی حمایت کرنے آں۔
کشمیر
- کشمیر وچ تنازعے نی سنگین نوعیت بارے یا جان و مال نے تباہ کن نقصان بارے کوئی شک نہیں کیتا جا سکدا، Labour تشدد تے دہشت گردی نی ساری کارروائیاں نی مذمت کرنی اے۔
- Labour ایس گل بارے پُرعزم اے کہ کشمیر نے مسئلے اُپر گہرے طور اُپر محسوس ہون آلے تے حقیقی طور اُپر موجود اختلافات کی اِتھے برطانیہ وچ کمیونٹیز کی تقسیم کرن نی اجازت نئیں دتی جانی چائیدی۔ ایس لئی حکومت وچ اساں ساری کمیونٹیز نال رل کے کم جاری رکھساں، بشمول انہاں متاثر کشمیریاں نیں جیہڑے اِتھے برطانیہ وچ موجود نیں۔
- Labour Party کی کشمیریاں کی درپیش چیلنجاں اُپر سخت تشویش اے، جنہاں وچ انسانی حقوق نی خلاف ورزیاں تے سول سوسائٹی تے آزاد میڈیا اُپر پابندیاں شامل نیں۔
- اساں ایس بارے واضح آں کہ ساریاں کی انسانی حقوق تے بین الاقوامی قنون نے عالمی اصولاں کی برقرار رکھنا چائیدا اے تے اے ضروری اے کہ انسان نی فلاح لئی کم کرن آلیاں تے انسانی حقوق نی تنظیماں کی مکمل رسائی حاصل ہووے۔
- Labour کشمیری عوام نے حقوق بارے UN نی قرارداداں نی حمایت تے تسلیم کرنی اے تے ایس گل اُپر یقین رکھنی اے کہ اگر اساں ایس جاری تنازعے کی ختم کرن لئی کوئی دیرپا تصفیہ تلاش کرنا چاہنے آں تے اے صرف انڈیا تے پاکستان ناں کشمیری عوام نال رل کے کم کرن توں ہی حاصل کیتا جا سکدا اے۔ سارے فریقاں کی ایہو جئے یکطرفہ فیصلے کرن توں باز رہنا چائینا اے جیہڑے اک پائیدار امن قائم کرن نے عمل کی زیادہ مشکل بنائی دینے۔
غزہ
Labour تنازعات نا مستقل خاتمہ تے طویل مدتی امن و سلامتی دیکھنا چاہنی اے۔ اسی اے مطالبے کرنے رئے آں
- دوناں پاسوں فوری جنگ بندی کیتی جائے۔
- غزہ تک بغیر روک ٹوک امداد تے ایس وچ تیزی نال اضافہ۔
- سارے یرغمالیاں نی فوری رہائی۔
- برطانیہ نا کوئی اسلحہ یا پرزہ جات اسرائیل کی ویچے نئیں جان گے جیہڑے پورے پیمانے اُپر رفح اُپر جارحیت وچ استعمال کیتے جان تے، اگر اساں منتخب ہونے آں، تے اسلحے نی برآمدات بارے قنونی مشورے نا جَیزہ لیساں تے اساں ایس مشورے اُپر عمل کرساں تاکہ اے یقینی بنایا جا سکے کہ برطانیہ آپنی ملکی تے بین الاقوامی ذمہ داریاں پوری کر ریا اے۔
- بین الاقوامی قانون کی برقرار رکھیا جائے، تے بین الاقوامی عدالتاں نی آزادی نا لازمی احترام کیتا جائے، نالے ایہہ کہ سارے فریقاں کی آپنے اعمال بارے جوابدہ ہونا چائینا اے۔
- اک تجدید امن عمل وچ شراکت نے طور اُپر اک فلسطینی ریاست کی تسلیم کرنا جس نے نتیجے وچ اک قابل عمل تے خودمختار فلسطینی ریاست نے نال نال اک محفوظ اسرائیل نا دو ریاستی حل نکلنا اے۔
- اساں UN وچ فلسطین نی رکنیت بارے برطانیہ نے موقف نا جَیزہ لیساں جیہڑا ایس ویلے اے باہنا اے کہ اے اسے ویلے ہونا چائینا اے جس ویلے برطانیہ فلسطین کی بطور ریاست تسلیم کرے۔
- اساں گھریلو شناخت تے UN نی رکنیت دوناں کی اگے ودھان نا بہترین طریقہ تلاش کرنا چاہنے آں۔
سوڈان
- Labour سوڈان نی تباہ کن صورتحال، بشمول دارفر وچ نسلی طور اُپر نشانہ بنائے جان آلے تشدد، بشمول جنسی تشدد، دی خوفناک رپورٹاں اُپر بوہت زیادہ فکر مند اے۔ شمالی دارفر وچ الفشر وچ مظالم نا خطرہ شدید اے تے Labour عالمی برادری نی طرفوں فوری مربوط کارروائی نی حمایت کرسی۔
- Labour سوڈانی لوکاں نال یکجہتی نا اظہار کرنی اے جیہڑے آپنے حقوق لئی کھڑے ہون وچ غیرمعمولی جرات تے عزم نا مظاہرہ کرنے رہنے ان۔
- اساں ہمسایہ ملک جنوبی سوڈان تے چاڈ سمیت بے گھر لوکاں نی جاری تکلیفاں کی کم کرن لئی انسانی ہمدردی نی بنیاد اُپر رسائی تے مدد نی کوششاں اُپر پابندیاں نی مذمت کرنے آں۔
- اساں پارلیمنٹ وچ مسلسل آپنے تحفظات نا اظہار کیتا اے، تے ایس جھگڑے لئی تیاری کرن تے سوڈان وچ امن و سلامتی نی حمایت لئی مؤثر طریقے نال کم کرن وچ ناکام ہون نی وجہ توں حکومت اُپر دباؤ پایا اے۔
- Labour فوری جنگ بندی، شہریاں نے تحفظ، بین الاقوامی قنون نی خلاف ورزیاں لئی جوابدہی، تے پرامن سویلین حکومت نی بحالی لئی مضبوط تے زیادہ مربوط بین الاقوامی کوششاں نی حمایت کرسی۔
جمہوریہ کانگو
- Labour Party کی جمہوریہ کانگو وچ سنگین انسانی بحران اُپر گہری تشویش اے۔
- اساں لوکاں نے گھراں توں وڈے پیمانے اُپر نقل مکانی تے جاری جنسی تشدد کی تسلیم کرنے آں۔
- اساں انسانی امداد تک رسائی تے بین الاقوامی قنون نی خلاف ورزیاں لئی جوابدہی نی حمایت کرنے آں۔
- اساں مسلح گروپاں نی ہر قسم نی بیرونی حمایت نی مذمت کرنے آں جیہڑے مشرقی جمہوریہ کانگو کی غیر مستحکم کر رئے آں۔ اساں بین الاقوامی شراکت داراں نال رل کے لوانڈا تے نیروبی نے عمل نی حمایت سمیت پائیدار امن لئی زور دیساں۔
- Labour جمہوریہ کانگو نی حکومت، اوس نے پڑوسیاں، تے علاقائی تے بین الاقوامی شراکت داراں نال رل کے کم کرن نی کوشش کرسی، تاکہ زیادہ متنوع، زیادہ منصفانہ تے زیادہ محفوظ سپلائی چینز نی حمایت کیتی جا سکے جیہڑی کہ برطانیہ، کانگو نی کمیونٹیز تے علاقائی ریاستاں لئی باہمی طور اُپر فَیدہ مند ہو سکنیاں نیں۔
